mangte hi rah gae bekas dua barsat ki

māñgte hī rah ga.e bekas duā barsāt kī

āsmāñ tū ne na dikhlā.ī ghaTā barsāt kī

ḳhushk guzrā ab ke sāvan bhī bahut hairāñ huuñ maiñ

ho ga.ī tabdīl yā-rab fasl kyā barsāt kī

āsmāñ par ek bhī badlī nazar aatī nahīñ

hai nazar badlī huī vā-hasratā barsāt kī

māñgtā huuñ maiñ duā-e-abr ro-ro kar abhī

aarzū tujh ko agar hai sāqiyā barsāt kī

phuul murjhā.e hue haiñ ġhunche kumlā.e hue

haal par in ke karam kar ai havā barsāt kī

zard hai dhānoñ kī rangat ḳhushk dahqānoñ ke lab

bhej de kaalī ghaTā ab ai ḳhudā barsāt kī

intizār-e-abr meñ 'mahrūm' bhī hai be-qarār

apnī rahmat se dikhā is ko fazā barsāt kī

mangte hi rah gae bekas dua barsat ki

aasman tu ne na dikhlai ghaTa barsat ki

KHushk guzra ab ke sawan bhi bahut hairan hun main

ho gai tabdil ya-rab fasl kya barsat ki

aasman par ek bhi badli nazar aati nahin

hai nazar badli hui wa-hasrata barsat ki

mangta hun main dua-e-abr ro-ro kar abhi

aarzu tujh ko agar hai saqiya barsat ki

phul murjhae hue hain ghunche kumlae hue

haal par in ke karam kar ai hawa barsat ki

zard hai dhanon ki rangat KHushk dahqanon ke lab

bhej de kali ghaTa ab ai KHuda barsat ki

intizar-e-abr mein 'mahrum' bhi hai be-qarar

apni rahmat se dikha is ko faza barsat ki