ma.anī-tarāz-e-ishq har ik bāda-ḳhvār thā
is mai-kade meñ mast jo thā hoshiyār thā
tamhīd thī junūñ kī garebāñ huā jo chaak
ya.anī ye ḳhair-maqdam-e-fasl-e-bahār thā
banñe lage haiñ daaġh sitāre ḳhushā-nasīb
tārīk āsmān-e-shab-e-intizār thā
the zindagī ke saath mohabbat ke kārobār
āḳhir kisī ke dar pe hamārā mazār thā
marne pe bhī kaTā na azāb-e-ġham-e-firāq
kunj-e-lahad ḳhulāsa-e-shab-hā-e-tār thā
āġhāz-e-ishq hī meñ mujhe chup sī lag ga.ī
ik baat bhī na kī ki nafas rāzdār thā
kyā lutf de gayā vo fareb-e-vafā kā daur
goyā kisī ke dil pe hameñ e'tibār thā
duniyā se rah-ravāñ-e-mohabbat guzar ga.e
is kārvāñ kā ālam-e-hastī ġhubār thā
chhuT kar qafas se maiñ na gayā sū-e-bostāñ
āḳhir fareb-ḳhurda-e-fasl-e-bahār thā
ik āh-e-garm ham ne bharī thī shab-e-firāq
jal kar sahar ko ḳhaak dil-e-be-qarār thā
fursat milī na ham ko tamāshā-e-dahr kī
har zarra husn-e-yār kā ā.īna-dār thā
ik laḳht-e-dil bachā thā magar vo bhī ai 'nazar'
āḳhir ko nazr-e-dīda-e-ḳhūñ-nāba-yār thā
mani-taraaz-e-ishq har ek baada-KHwar tha
is mai-kade mein mast jo tha hoshiyar tha
tamhid thi junun ki gareban hua jo chaak
yani ye KHair-maqdam-e-fasl-e-bahaar tha
banne lage hain dagh sitare KHusha-nasib
tarik aasman-e-shab-e-intizar tha
the zindagi ke sath mohabbat ke karobar
aaKHir kisi ke dar pe hamara mazar tha
marne pe bhi kaTa na azab-e-gham-e-firaq
kunj-e-lahad KHulasa-e-shab-ha-e-tar tha
aaghaz-e-ishq hi mein mujhe chup si lag gai
ek baat bhi na ki ki nafas raazdar tha
kya lutf de gaya wo fareb-e-wafa ka daur
goya kisi ke dil pe hamein e'tibar tha
duniya se rah-rawan-e-mohabbat guzar gae
is karwan ka aalam-e-hasti ghubar tha
chhuT kar qafas se main na gaya su-e-bostan
aaKHir fareb-KHurda-e-fasl-e-bahaar tha
ek aah-e-garm hum ne bhari thi shab-e-firaq
jal kar sahar ko KHak dil-e-be-qarar tha
fursat mili na hum ko tamasha-e-dahr ki
har zarra husn-e-yar ka aaina-dar tha
ek laKHt-e-dil bacha tha magar wo bhi ai 'nazar'
aaKHir ko nazr-e-dida-e-KHun-naba-yar tha
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.