maar Dālegī hameñ ye ḳhush-bayānī aap kī
maut kā paiġhām aa.egā zabānī aap kī
zindagī kahte haiñ kis ko maut kis kā naam hai
mehrbānī aap kī nā-mehrbānī aap kī
ba.ad-e-murdan khīñch laayā jazb-e-dil siine pe haath
ik añgūThī meñ jo pahne thā nishānī aap kī
baḌh chukā qad bhī faroġh-e-husn kī had ho chukī
ab to qābil dekhne ke hai javānī aap kī
aap se mil ke gale rāhat se aa jaatī hai niiñd
sabza-e-ḳhvābīda hai poshāk dhānī aap kī
rañg aalam kā badalnā aap ke sadqe meñ hai
jam.a kar rakkhī thiiñ poshākeñ purānī aap kī
āñkhoñ par bañdhvāī paTTī tā na dekhūñ aur ko
mar gayā maiñ par vahī hai bad-gumānī aap kī
jab vo mujh ko dekhtā hai hañs ke kahtā hai 'rashīd'
kitnī pāband-e-vafā hai zindagānī aap kī
mar Dalegi hamein ye KHush-bayani aap ki
maut ka paigham aaega zabani aap ki
zindagi kahte hain kis ko maut kis ka nam hai
mehrbani aap ki na-mehrbani aap ki
baad-e-murdan khinch laya jazb-e-dil sine pe hath
ek anguThi mein jo pahne tha nishani aap ki
baDh chuka qad bhi farogh-e-husn ki had ho chuki
ab to qabil dekhne ke hai jawani aap ki
aap se mil ke gale rahat se aa jati hai nind
sabza-e-KHwabida hai poshak dhani aap ki
rang aalam ka badalna aap ke sadqe mein hai
jama kar rakkhi thin poshaken purani aap ki
aankhon par bandhwai paTTi ta na dekhun aur ko
mar gaya main par wahi hai bad-gumani aap ki
jab wo mujh ko dekhta hai hans ke kahta hai 'rashid'
kitni paband-e-wafa hai zindagani aap ki
Source:
Gulistan-e-Rasheed (Pg. ghazal-119 page-107)
-
Author:
Piyare Sahab Rasheed
-
- Year of Publication: 1952
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.