madad ai ḳhayāl-e-māzī zarā aa.ina uThānā
maiñ badal gayā huuñ ḳhud hī ki badal gayā zamānā
mire ḳhāliq-e-gulistāñ ye samāñ na phir dikhānā
ki ḳhud apnī raushnī meñ nazar aa.e āshiyānā
ye hai jiddat-e-taḳhayyul to bhalā kahāñ Thikānā
mileñ bijliyoñ ke tinke to banā.ūñ āshiyānā
ye qafas qafas na rahtā nazar aatā āshiyānā
mire bāl-o-par se pahle mire dil kā TuuT jaanā
ye na pūchh phuul barse ki girī diloñ pe bijlī
zarā dekh aa.ine meñ kabhī apnā muskurānā
mirā ek ek aañsū ġham-e-fikr-e-do-jahāñ hai
kabhī ḳhushk karnā dāman kabhī āstīñ sukhānā
rag-o-pai meñ barq dauḌe yahī lutf-e-zindagī hai
mire muskurāne vaale yūñhī muskurā.e jaanā
mire shām-e-ġham kī zīnat mire āñsuoñ ke taaro
tumheñ kaam kyā sahar se kahīñ tum na Duub jaanā
kahūñ kyā 'sirāj' tum se jo guzar rahī hai dil par
ye qafas kī zindagī aur ye bahār kā zamāna
madad ai KHayal-e-mazi zara aaina uThana
main badal gaya hun KHud hi ki badal gaya zamana
mere KHaliq-e-gulistan ye saman na phir dikhana
ki KHud apni raushni mein nazar aae aashiyana
ye hai jiddat-e-taKHayyul to bhala kahan Thikana
milen bijliyon ke tinke to banaun aashiyana
ye qafas qafas na rahta nazar aata aashiyana
mere baal-o-par se pahle mere dil ka TuT jaana
ye na puchh phul barse ki giri dilon pe bijli
zara dekh aaine mein kabhi apna muskurana
mera ek ek aansu gham-e-fikr-e-do-jahan hai
kabhi KHushk karna daman kabhi aastin sukhana
rag-o-pai mein barq dauDe yahi lutf-e-zindagi hai
mere muskurane wale yunhi muskurae jaana
mere sham-e-gham ki zinat mere aansuon ke taro
tumhein kaam kya sahar se kahin tum na Dub jaana
kahun kya 'siraj' tum se jo guzar rahi hai dil par
ye qafas ki zindagi aur ye bahaar ka zamana
Source:
Shola-e-Aawaz (Pg. e-42 p-41)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.