mah-o-KHurshid-o-aKHtar likh raha hun

mah-o-ḳhurshīd-o-aḳhtar likh rahā huuñ

tire chehre kā manzar likh rahā huuñ

bahut tazlīl āñkhoñ kī huī hai

so ab har ġham ko andar likh rahā huuñ

harārat vaqt kī kaise na hogī

maiñ har lamhe ko chhū kar likh rahā huuñ

ġham-e-hastī maiñ apnā qadd-o-qāmat

tire qad ke barābar likh rahā huuñ

maiñ aise daur meñ zinda huuñ ab tak

jabhī ḳhud ko sikandar likh rahā huuñ

tirā paikar nazar meñ Dhal rahā hai

ki maiñ husn-e-gul-e-tar likh rahā huuñ

musalsal dhuup meñ hai raqs apnā

ki bachchoñ kā muqaddar likh rahā huuñ

maiñ ab lagtā huuñ ḳhud ko puure qad kā

magar ye baat jhuk kar likh rahā huuñ

mah-o-KHurshid-o-aKHtar likh raha hun

tere chehre ka manzar likh raha hun

bahut tazlil aankhon ki hui hai

so ab har gham ko andar likh raha hun

hararat waqt ki kaise na hogi

main har lamhe ko chhu kar likh raha hun

gham-e-hasti main apna qadd-o-qamat

tere qad ke barabar likh raha hun

main aise daur mein zinda hun ab tak

jabhi KHud ko sikandar likh raha hun

tera paikar nazar mein Dhal raha hai

ki main husn-e-gul-e-tar likh raha hun

musalsal dhup mein hai raqs apna

ki bachchon ka muqaddar likh raha hun

main ab lagta hun KHud ko pure qad ka

magar ye baat jhuk kar likh raha hun