mahfil mein tere kaun tha jo shadman na tha

mahfil meñ tere kaun thā jo shādmāñ na thā

sab the sharīk-e-bazm magar maiñ vahāñ na thā

zulfoñ ke dhyān se thā añdherā tamām shab

tārīk is qadar to savād-e-jahāñ na thā

bālā-e-bām chāñd huā kyoñ nahīñ tulūa

ai rashk-e-mah vo auj meñ kyā āsmāñ na thā

pahuñchā falak pe nāla-e-ātish-fashāñ mirā

kyā barq-e-sho.ala-rez thī jis meñ dhuāñ na thā

māmūr tere nuur se har ek zarra hai

dair-o-haram meñ jalva tirā kab ayaañ na thā

farmāyā tū ne jabki alastu-birabbikum

juz zāt-e-pāk koī vahāñ aur yahāñ na thā

kis ne balā kahā thā balā meñ jo phañs gayā

lekin vahāñ to koī tirā ham-zabāñ na thā

lākhoñ hasīn dekhe haiñ ham ne jahān meñ

tujh sā hasīn koī bhī jān-e-jahāñ na thā

yūsuf se koī chaah thā ḳhālī na dahr meñ

andhe hamīñ the koī bhī andhā kuaañ na thā

hāsid ko rashk hai to isī ek baat kā

bijlī jahāñ girī thī mirā āshiyāñ na thā

apnā patā lagā to faqat terī zaat se

varna jahāñ meñ aur koī be-nishāñ na thā

terī hī ek zaat hai donoñ jahān meñ

poshīda koī ġhair yahāñ darmiyāñ na thā

saa.e kī tarah rahtā thā har dam maiñ tere saath

tujh sā rafīq koī bhī ai jān-e-jāñ na thā

bulbul kā āshiyāñ na bachā dast-burd se

kis roz be-zabānoñ pe jaur-e-ḳhizāñ na thā

jām-e-sharāb maiñ ne pilāyā hai shaiḳh ko

qaazī se pūchho kyā vo mirā mehmāñ na thā

ai 'shād' har balā se usī ne bachā liyā

aisā nigāhbān koī pāsbāñ na thā

mahfil mein tere kaun tha jo shadman na tha

sab the sharik-e-bazm magar main wahan na tha

zulfon ke dhyan se tha andhera tamam shab

tarik is qadar to sawad-e-jahan na tha

baala-e-baam chand hua kyon nahin tulua

ai rashk-e-mah wo auj mein kya aasman na tha

pahuncha falak pe nala-e-atish-fashan mera

kya barq-e-shoala-rez thi jis mein dhuan na tha

mamur tere nur se har ek zarra hai

dair-o-haram mein jalwa tera kab ayan na tha

farmaya tu ne jabki alastu-birabbikum

juz zat-e-pak koi wahan aur yahan na tha

kis ne bala kaha tha bala mein jo phans gaya

lekin wahan to koi tera ham-zaban na tha

lakhon hasin dekhe hain hum ne jahan mein

tujh sa hasin koi bhi jaan-e-jahan na tha

yusuf se koi chah tha KHali na dahr mein

andhe hamin the koi bhi andha kuan na tha

hasid ko rashk hai to isi ek baat ka

bijli jahan giri thi mera aashiyan na tha

apna pata laga to faqat teri zat se

warna jahan mein aur koi be-nishan na tha

teri hi ek zat hai donon jahan mein

poshida koi ghair yahan darmiyan na tha

sae ki tarah rahta tha har dam main tere sath

tujh sa rafiq koi bhi ai jaan-e-jaan na tha

bulbul ka aashiyan na bacha dast-burd se

kis roz be-zabanon pe jaur-e-KHizan na tha

jam-e-sharab main ne pilaya hai shaiKH ko

qazi se puchho kya wo mera mehman na tha

ai 'shad' har bala se usi ne bacha liya

aisa nigahban koi pasban na tha