mahfilon ko guzar pae hum

mahfiloñ ko guzār paa.e ham

tab kahīñ ḳhalvatoñ pe chhā.e ham

haiñ udāsī ke kokh-jā.e ham

zindagī ko na raas aa.e ham

khaad paanī banā diyā ḳhud ko

silsile-vār lahlahā.e ham

nasl tāroñ kī zid lagā baiThī

isti.āre utaar laa.e ham

ruuh ke hoñTh sil ke hī maane

harkatoñ se na ba.az aa.e ham

farz ham par hai raushnī kā safar

nuur kī chhūT ke haiñ jaa.e ham

pyaas ko pyaar karnā thā keval

ek akhshar badal na paa.e ham

bas hamāre hī saath rahtī hai

kyuuñ udāsī ko itnā bhaa.e ham

mahfilon ko guzar pae hum

tab kahin KHalwaton pe chhae hum

hain udasi ke kokh-jae hum

zindagi ko na ras aae hum

khad pani bana diya KHud ko

silsile-war lahlahae hum

nasl taron ki zid laga baiThi

istiare utar lae hum

ruh ke honTh sil ke hi mane

harkaton se na baz aae hum

farz hum par hai raushni ka safar

nur ki chhuT ke hain jae hum

pyas ko pyar karna tha kewal

ek akhshar badal na pae hum

bas hamare hi sath rahti hai

kyun udasi ko itna bhae hum