mahtab-sifat log yahan KHak-basar hain

mahtāb-sifat log yahāñ ḳhāk-basar haiñ

ham mahv-e-tamāshā-e-sar-e-rāh-guzar haiñ

hasrat sī barastī hai dar-o-bām pe har sū

rotī huī galiyāñ haiñ sisakte hue ghar haiñ

aa.e the yahāñ jin ke tasavvur ke sahāre

vo chāñd vo sūraj vo shab-o-roz kidhar haiñ

so.e ho ghanī zulf ke saa.e meñ abhī tak

ai rāh-ravāñ kyā yahī andāz-e-safar haiñ

vo log qadam jin ke liye kāhkashāñ ne

vo log bhī ai ham-nafaso ham se bashar haiñ

bik jaa.eñ jo har shaḳhs ke hāthoñ sar-e-bāzār

ham yūsuf-e-kan.āñ haiñ na ham la.al-o-gohar haiñ

ham log mileñge to mohabbat se mileñge

ham nuz.hat-e-mahtāb haiñ ham nūr-e-sahar haiñ

mahtab-sifat log yahan KHak-basar hain

hum mahw-e-tamasha-e-sar-e-rah-guzar hain

hasrat si barasti hai dar-o-baam pe har su

roti hui galiyan hain sisakte hue ghar hain

aae the yahan jin ke tasawwur ke sahaare

wo chand wo suraj wo shab-o-roz kidhar hain

soe ho ghani zulf ke sae mein abhi tak

ai rah-rawan kya yahi andaz-e-safar hain

wo log qadam jin ke liye kahkashan ne

wo log bhi ai ham-nafaso hum se bashar hain

bik jaen jo har shaKHs ke hathon sar-e-bazar

hum yusuf-e-kanan hain na hum lal-o-gohar hain

hum log milenge to mohabbat se milenge

hum nuzhat-e-mahtab hain hum nur-e-sahar hain