mahw-e-didar-e-yar hun chup hun

mahv-e-dīdār-e-yār huuñ chup huuñ

itnā be-iḳhtiyār huuñ chup huuñ

vo rukhā.ī se ghoñTte haiñ galā

kyā kahūñ be-qarār huuñ chup huuñ

rāz-e-dil gar kahūñ to haal khule

jān-o-jī se nisār huuñ chup huuñ

kaun qātil ke aage dam maare

kyā kahūñ dil-figār huuñ chup huuñ

dekhtā yād-e-chashm meñ 'tanvīr'

sair-o-lail-o-nihār huuñ chup huuñ

mahw-e-didar-e-yar hun chup hun

itna be-iKHtiyar hun chup hun

wo rukhai se ghonTte hain gala

kya kahun be-qarar hun chup hun

raaz-e-dil gar kahun to haal khule

jaan-o-ji se nisar hun chup hun

kaun qatil ke aage dam mare

kya kahun dil-figar hun chup hun

dekhta yaad-e-chashm mein 'tanwir'

sair-o-lail-o-nihaar hun chup hun