mahw-e-ruKH-e-yar ho gae hum

mahv-e-ruḳh-e-yār ho ga.e ham

so jī se nisār ho ga.e ham

fitrāk se bāñdh ḳhvāh mat bāñdh

ab tere shikār ho ga.e ham

dāman ko na pahuñche tere ab tak

har chand ġhubār ho ga.e ham

aatā nahīñ koī ab nazar meñ

kis se ye do-chār ho ga.e ham

thā kaun ki dekhte hī jis ke

yuuñ āshiq-e-zār ho ga.e ham

hastī hī hijāb thī jo dekhā

is bahar se paar ho ga.e ham

'bedār' sarishk-e-lāla-gūñ se

ham-chashm-e-bahār ho ga.e ham

mahw-e-ruKH-e-yar ho gae hum

so ji se nisar ho gae hum

fitrak se bandh KHwah mat bandh

ab tere shikar ho gae hum

daman ko na pahunche tere ab tak

har chand ghubar ho gae hum

aata nahin koi ab nazar mein

kis se ye do-chaar ho gae hum

tha kaun ki dekhte hi jis ke

yun aashiq-e-zar ho gae hum

hasti hi hijab thi jo dekha

is bahar se par ho gae hum

'bedar' sarishk-e-lala-gun se

ham-chashm-e-bahaar ho gae hum