mahw hun main jo us sitamgar ka

mahv huuñ maiñ jo us sitamgar kā

hai gila apne hāl-e-abtar kā

haal likhtā huuñ jān-e-muztar kā

rag-e-bismil hai taar mistar kā

aañkh phirne se terī mujh ko huā

gardish-e-dahr daur sāġhar kā

shola-rū yaar shola-rañg sharāb

kaam yaañ kyā hai dāman-e-tar kā

shauq ko aaj be-qarārī hai

aur vaada hai roz-e-mahshar kā

naqsh-e-tasḳhīr-e-ġhair ko us ne

ḳhuuñ liyā to mire kabūtar kā

merī nākāmī se falak ko husūl

kaam hai ye usī sitamgar kā

us ne āshiq likhā adū ko laqab

haa.e likkhā mire muqaddar kā

aap se lahza lahza jaate ho

'sheftā' hai ḳhayāl kis ghar kā

mahw hun main jo us sitamgar ka

hai gila apne haal-e-abtar ka

haal likhta hun jaan-e-muztar ka

rag-e-bismil hai tar mistar ka

aankh phirne se teri mujh ko hua

gardish-e-dahr daur saghar ka

shola-ru yar shola-rang sharab

kaam yan kya hai daman-e-tar ka

shauq ko aaj be-qarari hai

aur wada hai roz-e-mahshar ka

naqsh-e-tasKHir-e-ghair ko us ne

KHun liya to mere kabutar ka

meri nakaami se falak ko husul

kaam hai ye usi sitamgar ka

us ne aashiq likha adu ko laqab

hae likkha mere muqaddar ka

aap se lahza lahza jate ho

'shefta' hai KHayal kis ghar ka