mai-e-gul-rang se labrez rahen jam safed

mai-e-gul-rañg se labrez raheñ jaam safed

chashm-e-bad-bīñ ko kare gardish-e-ayyām safed

bas-ki us but kī tabī.at hai zamāne se ḳhilāf

sub.h poshāk siyah hai to sar-e-shām safed

kaun sī shaam nahīñ sub.h huī ai maġhrūr

ek din hotī hai ye zulf-e-siyah-fām safed

qatra-e-ashk meñ surḳhī kā kahīñ naam nahīñ

lahū terā bhī huā ai dil-e-nākām safed

dil kī taskīñ ko maiñ paiġhām safā kā samjhūñ

purza kāġhaz kā jo bheje vo gul-andām safed

chāñdnī raat meñ vo maah jo yaad aatā hai

kāTne dauḌte haiñ mujh ko dar-o-bām safed

vasl kī shab jo huī sub.h yakāyak to huā

maiñ idhar zard udhar rū-e-dilārām safed

nisbat us fitna-e-daurāñ se koī andhā de

yaar kī aañkh siyah dīda-e-bādām safed

kisī hālat meñ nahīñ fikr se dushman ġhāfil

āfat-e-murġh hai rañgīn ho bādām safed

bas hai itnī hī zamāna kī do-rañgī 'ātish'

mai-e-gul-rañg se labrez raheñ jaam safed

mai-e-gul-rang se labrez rahen jam safed

chashm-e-bad-bin ko kare gardish-e-ayyam safed

bas-ki us but ki tabiat hai zamane se KHilaf

subh poshak siyah hai to sar-e-sham safed

kaun si sham nahin subh hui ai maghrur

ek din hoti hai ye zulf-e-siyah-fam safed

qatra-e-ashk mein surKHi ka kahin nam nahin

lahu tera bhi hua ai dil-e-nakaam safed

dil ki taskin ko main paigham safa ka samjhun

purza kaghaz ka jo bheje wo gul-andam safed

chandni raat mein wo mah jo yaad aata hai

kaTne dauDte hain mujh ko dar-o-baam safed

wasl ki shab jo hui subh yakayak to hua

main idhar zard udhar ru-e-dilaram safed

nisbat us fitna-e-dauran se koi andha de

yar ki aankh siyah dida-e-baadam safed

kisi haalat mein nahin fikr se dushman ghafil

aafat-e-murgh hai rangin ho baadam safed

bas hai itni hi zamana ki do-rangi 'atish'

mai-e-gul-rang se labrez rahen jam safed