mai ka ye ehtiram are tauba

mai kā ye ehtirām are tauba

aur phir vo harām are tauba

dil ko sarmast kar hī detī hai

yād-e-sāqī-o-jām are tauba

allāh allāh kar are zāhid

jām-e-mai sub.h-o-shām are tauba

but-parastī meñ jis kī umr kaTī

aise kāfir kā naam are tauba

ek be-jāñ ke qatl karne ko

is qadar ehtimām are tauba

ġham-zadoñ kī ye ḳhāmushī hai ġhazab

sabr kā intiqām are tauba

aaj bhūle se le liyā kis ne

'shauq'-e-rusvā kā naam are tauba

mai ka ye ehtiram are tauba

aur phir wo haram are tauba

dil ko sarmast kar hi deti hai

yaad-e-saqi-o-jam are tauba

allah allah kar are zahid

jam-e-mai subh-o-sham are tauba

but-parasti mein jis ki umr kaTi

aise kafir ka nam are tauba

ek be-jaan ke qatl karne ko

is qadar ehtimam are tauba

gham-zadon ki ye KHamushi hai ghazab

sabr ka intiqam are tauba

aaj bhule se le liya kis ne

'shauq'-e-ruswa ka nam are tauba