maiKHane ka dar kyon hai muqaffal mutawatir

maiḳhāne kā dar kyoñ hai muqaffal mutavātir

rahtī hai tabī.at mirī bojhal mutavātir

kartā hai vo kyā teġh ko saiqal mutavātir

ik barq hai raqsāñ sar-e-maqtal mutavātir

vo kal bhī kabhī aa.egī jis kal ko tū aa.e

suntā hī rahūñ yā tirī kal kal mutavātir

kab qais ke marne se koī farq paḌā hai

aate hī rahe dasht meñ pāgal mutavātir

kal ḳhvāb meñ dekhe the dhanak-rañg falak par

yaad aatā hai mujh ko tirā āñchal mutavātir

mahtāb-ruḳh utrā hai koī us meñ yaqīnan

hai qulzum-e-dil meñ jo ye halchal mutavātir

'salmān' ko dekho ki hai maqtal meñ vo raqsāñ

lab par hai tirā zikr musalsal mutavātir

maiKHane ka dar kyon hai muqaffal mutawatir

rahti hai tabiat meri bojhal mutawatir

karta hai wo kya tegh ko saiqal mutawatir

ek barq hai raqsan sar-e-maqtal mutawatir

wo kal bhi kabhi aaegi jis kal ko tu aae

sunta hi rahun ya teri kal kal mutawatir

kab qais ke marne se koi farq paDa hai

aate hi rahe dasht mein pagal mutawatir

kal KHwab mein dekhe the dhanak-rang falak par

yaad aata hai mujh ko tera aanchal mutawatir

mahtab-ruKH utra hai koi us mein yaqinan

hai qulzum-e-dil mein jo ye halchal mutawatir

'salman' ko dekho ki hai maqtal mein wo raqsan

lab par hai tera zikr musalsal mutawatir