maiKHane pe chhai hai afsurda-shabi kab se

maiḳhāne pe chhā.ī hai afsurda-shabī kab se

sāġhar se gurezāñ hai ḳhud tishna-labī kab se

ai sāya-e-gesū ke dīvāno batāo to

me.ār-e-junūñ Thahrī rāhat-talabī kab se

chūsā hai lahū jis ne barsoñ mah-o-anjum kā

insāñ kā muqaddar hai vo tīra-shabī kab se

ik hashr sā barpā hai zindāñ se bayābāñ tak

pāband-e-salāsil hai īzā-talabī kab se

jis ke liye saaz apnā sar phoḌte phirte haiñ

naġhmoñ kī vo daulat hai siine meñ dabī kab se

jo dār-o-rasan ko bhī ḳhātir meñ nahīñ laatī

ta.azīr ke qābil hai vo be-adabī kab se

fursat ġham-e-daurāñ se miltī hī nahīñ 'arshad'

dil meñ liye phirte haiñ mauj-e-inabī kab se

maiKHane pe chhai hai afsurda-shabi kab se

saghar se gurezan hai KHud tishna-labi kab se

ai saya-e-gesu ke diwano batao to

mear-e-junun Thahri rahat-talabi kab se

chusa hai lahu jis ne barson mah-o-anjum ka

insan ka muqaddar hai wo tira-shabi kab se

ek hashr sa barpa hai zindan se bayaban tak

paband-e-salasil hai iza-talabi kab se

jis ke liye saz apna sar phoDte phirte hain

naghmon ki wo daulat hai sine mein dabi kab se

jo dar-o-rasan ko bhi KHatir mein nahin lati

tazir ke qabil hai wo be-adabi kab se

fursat gham-e-dauran se milti hi nahin 'arshad'

dil mein liye phirte hain mauj-e-inabi kab se