main ab mazi ka har sapna suhana bhul jata hun

maiñ ab maazī kā har sapnā suhāna bhuul jaatā huuñ

mirī jānāñ tirā milnā-milānā bhuul jaatā huuñ

vo merā dost thā ab dushman-e-jāñ ban gayā hai jab

maiñ us ko dekh kar apnā nishāna bhuul jaatā huuñ

jo kal tak yaar thā merā magar ab ġhair hai yaaro

tabhī to us se ab dil kā lagānā bhuul jaatā huuñ

kabhī jis ne diyā thā dard mujh ko rāh-e-ulfat meñ

vo dard-e-dil mirī jānāñ purānā bhuul jaatā huuñ

likhā thā shā.ir-e-mashriq ne apne ḳhuun se jis ko

ajab hālāt haiñ ab vo tarāna bhuul jaatā huuñ

darīcha band rahtā hai ab us ke ghar kā ai 'sājid'

maiñ ab mahbūb ke kūche meñ jaanā bhuul jaatā huuñ

main ab mazi ka har sapna suhana bhul jata hun

meri jaanan tera milna-milana bhul jata hun

wo mera dost tha ab dushman-e-jaan ban gaya hai jab

main us ko dekh kar apna nishana bhul jata hun

jo kal tak yar tha mera magar ab ghair hai yaro

tabhi to us se ab dil ka lagana bhul jata hun

kabhi jis ne diya tha dard mujh ko rah-e-ulfat mein

wo dard-e-dil meri jaanan purana bhul jata hun

likha tha shair-e-mashriq ne apne KHun se jis ko

ajab haalat hain ab wo tarana bhul jata hun

daricha band rahta hai ab us ke ghar ka ai 'sajid'

main ab mahbub ke kuche mein jaana bhul jata hun