main agar kar dun raqam josh-e-junun kaghaz par

maiñ agar kar duuñ raqam josh-e-junūñ kāġhaz par

lafz ban ban ke Dhale dil kā ye ḳhuuñ kāġhaz par

kyā ḳhabar kaun se harfoñ ko milāte hoñge

kabhī likkhā hī nahīñ ham ne sukūñ kāġhaz par

tai-shuda hai kī tamām-umr badan uTh na sake

maiñ kabhī likh duuñ agar sar ko nigūñ kāġhaz par

TuuT ke phir to adū ke kahīñ kaam aate haiñ

jab bhī chaltā hai mohabbat kā fusūñ kāġhaz par

us ne jab bāġh-e-nihāñ ko nihāñ rakkhā gulzār

ham ne bhī sabz rakhā dasht-e-darūñ kāġhaz par

mujh se barham hai falak itnī sī ḳhvāhish pe mirī

toḌ kar ek sitāre ko rakhūñ kāġhaz par

ab yahī kaam hai tasvīr-numā.ī terī

aur phir pahroñ tujhe taktā rahūñ kāġhaz par

jū-e-ḳhūñ āñkhoñ talak aane lagī thī so mujhe

kaaT kar rakhnā paḌā zaḳhm-e-darūñ kāġhaz par

kuchh haqīqat ke bhī lafzoñ ko jagah do 'nāyāb'

likhte rahte ho bhalā karb hī kyuuñ kāġhaz par

main agar kar dun raqam josh-e-junun kaghaz par

lafz ban ban ke Dhale dil ka ye KHun kaghaz par

kya KHabar kaun se harfon ko milate honge

kabhi likkha hi nahin hum ne sukun kaghaz par

tai-shuda hai ki tamam-umr badan uTh na sake

main kabhi likh dun agar sar ko nigun kaghaz par

TuT ke phir to adu ke kahin kaam aate hain

jab bhi chalta hai mohabbat ka fusun kaghaz par

us ne jab bagh-e-nihan ko nihan rakkha gulzar

hum ne bhi sabz rakha dasht-e-darun kaghaz par

mujh se barham hai falak itni si KHwahish pe meri

toD kar ek sitare ko rakhun kaghaz par

ab yahi kaam hai taswir-numai teri

aur phir pahron tujhe takta rahun kaghaz par

ju-e-KHun aankhon talak aane lagi thi so mujhe

kaT kar rakhna paDa zaKHm-e-darun kaghaz par

kuchh haqiqat ke bhi lafzon ko jagah do 'nayab'

likhte rahte ho bhala karb hi kyun kaghaz par