main apne taur pe khela tha aabginon se

maiñ apne taur pe khelā thā ābgīnoñ se

milā huuñ yāroñ ko taht-us-surā ke zīnoñ se

maiñ aise shaḳhs kī taqlīd karnā chāhtā huuñ

jo saañs letā rahā dostoñ ke sīnoñ se

gumāñ guzartā hai duniyā kī tez-gāmī se

ki log ḳhvāb bhī dekheñge dūr-bīnoñ se

ye tajraba hai mirā sarsarī sī baat nahīñ

koī bhī nukta milegā na nukta-chīnoñ se

hamārī āñkhoñ se aañsū gire nadāmat ke

hai diin phuuT paḌā kufr kī zamīnoñ se

salāmī kā hai ye andāz jāntā huuñ magar

bahut se haath haiñ Tāñke ga.e jabīnoñ se

mizāj-e-vaqt moharram safar pe baat kareñ

sadī kā karb to mansūb hai mahīnoñ se

ye ālamīn kī tartīb hī ulaT jaa.e

nikālā jaa.e madīna agar madīnoñ se

maiñ us dayār kī miTTī ko nuur jāntā huuñ

jahāñ pe barchhiyāñ toḌī ga.ī thī sīnoñ se

ye shaam jhiil shafaq mo'atabar haiñ apnī jagah

mirā mizāj zarā muḳhtalif hai tīnoñ se

sharāfatoñ meñ vo yūsuf-mizāj hote haiñ

tumheñ milā.ūñgā ġhurbat-zada hasīnoñ se

maiñ sīdhī baat kā aadī huuñ saañp kyuuñ bolūñ

maiñ apne yaar nikālūñgā āstīnoñ se

main apne taur pe khela tha aabginon se

mila hun yaron ko taht-us-sura ke zinon se

main aise shaKHs ki taqlid karna chahta hun

jo sans leta raha doston ke sinon se

guman guzarta hai duniya ki tez-gami se

ki log KHwab bhi dekhenge dur-binon se

ye tajraba hai mera sarsari si baat nahin

koi bhi nukta milega na nukta-chinon se

hamari aankhon se aansu gire nadamat ke

hai din phuT paDa kufr ki zaminon se

salami ka hai ye andaz jaanta hun magar

bahut se hath hain Tanke gae jabinon se

mizaj-e-waqt moharram safar pe baat karen

sadi ka karb to mansub hai mahinon se

ye aalamin ki tartib hi ulaT jae

nikala jae madina agar madinon se

main us dayar ki miTTi ko nur jaanta hun

jahan pe barchhiyan toDi gai thi sinon se

ye sham jhil shafaq mo'atabar hain apni jagah

mera mizaj zara muKHtalif hai tinon se

sharafaton mein wo yusuf-mizaj hote hain

tumhein milaunga ghurbat-zada hasinon se

main sidhi baat ka aadi hun sanp kyun bolun

main apne yar nikalunga aastinon se