main apni wusaton ko us gali mein bhul jata hun

maiñ apnī vus.atoñ ko us galī meñ bhuul jaatā huuñ

na jaane kaun se jaadū ke hāthoñ meñ khilaunā huuñ

safar ye pāniyoñ kā jab mujhe be-āb kartā hai

maiñ dariyā kī rupahlī ret ko bistar banātā huuñ

savāloñ ke ka.ī patthar uThā.e log baiThe haiñ

maiñ apnā nanhā bachcha qabr meñ dafnā ke lauTā huuñ

na jaane kis fazā meñ kho gayā vo dūdhiyā āñchal

ki jis ke faiz se maiñ kitnī āñkhoñ kā ujālā huuñ

vo sūraj mere chāroñ samt hai phailā huā lekin

maiñ aksar ajnabī dhundlāhaToñ meñ Duub jaatā huuñ

lipaT jaatī hai merī uñgliyoñ se ḳhud shafaq aa kar

sahar kī samt jab maiñ apne hāthoñ ko baḌhātā huuñ

koī to hai ki jo mujh ko ujāle baḳhsh jaatā hai

ba-zāhir maiñ kisī tārīk Taapu meñ akelā huuñ

mire siine meñ 'ambar' ik dhanak sī phail jaatī hai

maiñ apne āñsuoñ kī chāñdnī meñ she'r likhtā huuñ

main apni wusaton ko us gali mein bhul jata hun

na jaane kaun se jadu ke hathon mein khilauna hun

safar ye paniyon ka jab mujhe be-ab karta hai

main dariya ki rupahli ret ko bistar banata hun

sawalon ke kai patthar uThae log baiThe hain

main apna nanha bachcha qabr mein dafna ke lauTa hun

na jaane kis faza mein kho gaya wo dudhiya aanchal

ki jis ke faiz se main kitni aankhon ka ujala hun

wo suraj mere chaaron samt hai phaila hua lekin

main aksar ajnabi dhundlahaTon mein Dub jata hun

lipaT jati hai meri ungliyon se KHud shafaq aa kar

sahar ki samt jab main apne hathon ko baDhata hun

koi to hai ki jo mujh ko ujale baKHsh jata hai

ba-zahir main kisi tarik Tapu mein akela hun

mere sine mein 'ambar' ek dhanak si phail jati hai

main apne aansuon ki chandni mein she'r likhta hun