main ba-wafa hi raha rah ke be-wafaon mein

maiñ bā-vafā hī rahā rah ke be-vafāoñ meñ

gul-e-bahār kī sūrat khilā ḳhizāoñ meñ

bharī bahār meñ dekhe jo phuul jalte hue

ruke na ashkoñ ke dariyā mirī ghaTāoñ meñ

hamāre hāthoñ se jab vaqt kī girah na khulī

to log samjhe ki ham ḳhush haiñ ibtilāoñ meñ

tire huzūr rahī qahqahoñ pe pābandī

rahā hai ḳhauf bhī raqsāñ mirī sadāoñ meñ

karo na saarī mukaddar fazā jahāñ vaalo

mire bhī hisse kī sāñseñ haiñ in havāoñ meñ

ḳhulūs kī na chalī ek bhī yahāñ 'ashraf'

gañvāyā vaqt abas ham ne iltijāoñ meñ

main ba-wafa hi raha rah ke be-wafaon mein

gul-e-bahaar ki surat khila KHizaon mein

bhari bahaar mein dekhe jo phul jalte hue

ruke na ashkon ke dariya meri ghaTaon mein

hamare hathon se jab waqt ki girah na khuli

to log samjhe ki hum KHush hain ibtilaon mein

tere huzur rahi qahqahon pe pabandi

raha hai KHauf bhi raqsan meri sadaon mein

karo na sari mukaddar faza jahan walo

mere bhi hisse ki sansen hain in hawaon mein

KHulus ki na chali ek bhi yahan 'ashraf'

ganwaya waqt abas hum ne iltijaon mein