main baat apne dil ki batane se rah gaya

maiñ baat apne dil kī batāne se rah gayā

manzil ke paas ho ke bhī paane se rah gayā

mahbūb apnā thā hī taġhāful kā 'illatī

so hāl-e-dil bhī dhyān meñ aane se rah gayā

kho baiThā thā maiñ hosh-o-havās apne jis ghaḌī

vo lamha mujh se aage baḌhāne se rah gayā

vo gul baTor le gayā tā'rīfeñ baaġh meñ

maiñ ḳhaar thā so zikr meñ aane se rah gayā

kānhā se itnī minnateñ karne ke baa'd bhī

ik shaḳhs ko gale se lagāne se rah gayā

had se ziyāda achchhe bane rahnā jahl thā

bas ye sabaq maiñ ḳhud ko sikhāne se rah gayā

main baat apne dil ki batane se rah gaya

manzil ke pas ho ke bhi pane se rah gaya

mahbub apna tha hi taghaful ka 'illati

so haal-e-dil bhi dhyan mein aane se rah gaya

kho baiTha tha main hosh-o-hawas apne jis ghaDi

wo lamha mujh se aage baDhane se rah gaya

wo gul baTor le gaya ta'rifen bagh mein

main KHar tha so zikr mein aane se rah gaya

kanha se itni minnaten karne ke ba'd bhi

ek shaKHs ko gale se lagane se rah gaya

had se ziyaada achchhe bane rahna jahl tha

bas ye sabaq main KHud ko sikhane se rah gaya