maiñ bosa lūñgā bahāne batā.iye na mujhe
jo dil liyā hai to qīmat dilā.iye na mujhe
diloñ meñ Tālte ho dam nikal hī jāvegā
maiñ nā-tavāñ huuñ bahut āzmā.iye na mujhe
bahut dinoñ se masīhā.ī kā ho dam bharte
marā huā huuñ tumhīñ par jilā.iye na mujhe
ḳhat aap bhejeñge mujh ko patang par likh kar
ye Dore jaate hue haiñ uḌā.iye na mujhe
khilāyā chāhiye ho gul raqīb ke aage
ye garmī aur se kiije jalā.iye na mujhe
tumheñ raqīb kī ḳhātir hai lo maiñ jaatā huuñ
uThā.iye na hayā ko biThā.iye na mujhe
main bosa lunga bahane bataiye na mujhe
jo dil liya hai to qimat dilaiye na mujhe
dilon mein Talte ho dam nikal hi jawega
main na-tawan hun bahut aazmaiye na mujhe
bahut dinon se masihai ka ho dam bharte
mara hua hun tumhin par jilaiye na mujhe
KHat aap bhejenge mujh ko patang par likh kar
ye Dore jate hue hain uDaiye na mujhe
khilaya chahiye ho gul raqib ke aage
ye garmi aur se kije jalaiye na mujhe
tumhein raqib ki KHatir hai lo main jata hun
uThaiye na haya ko biThaiye na mujhe
Source:
Deewan-e-Naseem (Pg. 31)
-
Author:
Pandit Daya Shankar Naseem Lakhnawi
-
- Publisher: Matba Gulshan-e-Faiz, Lucknow
- Year of Publication: 1895
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.