main dariya hun magar donon taraf sahil hai tanhai

maiñ dariyā huuñ magar donoñ taraf sāhil hai tanhā.ī

talātum-ḳhez maujoñ meñ mirī shāmil hai tanhā.ī

mohabbat ho to tanhā.ī meñ bhī ik kaif hotā hai

tamannāoñ kī naġhma-āfrīñ mahfil hai tanhā.ī

bahut din vaqt kī hañgāma-ārā.ī meñ guzre haiñ

inheñ guzre hue ayyām kā hāsil hai tanhā.ī

hujūm-e-zīst se duurī ne ye māhaul baḳhshā hai

akelī maiñ mirā kamrā hai aur qātil hai tanhā.ī

mire har kaam kī mujh ko vahī tahrīk detī hai

agarche dekhne meñ kis qadar mushkil hai tanhā.ī

usī ne to taḳhayyul ko mire parvāz baḳhshī hai

ḳhudā kā shukr hai jo ab kisī qābil hai tanhā.ī

mohabbat kī shuāoñ se tavānā.ī jo miltī hai

isī rañgīnī-e-mafhūm meñ dāḳhil hai tanhā.ī

ḳhudā hasrat-zada dil kī tamannāoñ se vāqif hai

duā.eñ roz-o-shab kartī huī saa.il hai tanhā.ī

kisī kī yaad hai dil meñ abhī tak anjuman-ārā

'sabīla' kaun samjhegā ki merā dil hai tanhā.ī

main dariya hun magar donon taraf sahil hai tanhai

talatum-KHez maujon mein meri shamil hai tanhai

mohabbat ho to tanhai mein bhi ek kaif hota hai

tamannaon ki naghma-afrin mahfil hai tanhai

bahut din waqt ki hangama-arai mein guzre hain

inhen guzre hue ayyam ka hasil hai tanhai

hujum-e-zist se duri ne ye mahaul baKHsha hai

akeli main mera kamra hai aur qatil hai tanhai

mere har kaam ki mujh ko wahi tahrik deti hai

agarche dekhne mein kis qadar mushkil hai tanhai

usi ne to taKHayyul ko mere parwaz baKHshi hai

KHuda ka shukr hai jo ab kisi qabil hai tanhai

mohabbat ki shuaon se tawanai jo milti hai

isi rangini-e-mafhum mein daKHil hai tanhai

KHuda hasrat-zada dil ki tamannaon se waqif hai

duaen roz-o-shab karti hui sail hai tanhai

kisi ki yaad hai dil mein abhi tak anjuman-ara

'sabila' kaun samjhega ki mera dil hai tanhai