main dasht mein gar KHud ko muhayya nahin karta

maiñ dasht meñ gar ḳhud ko muhayyā nahīñ kartā

gardish se rihā mujh ko bagūla nahīñ kartā

pahchān ko ik dil hī madad-gār bahut hai

so pesh koī aur havāla nahīñ kartā

dekhā hī nahīñ aañkh ne jis shahr ko pahle

vo bhī mirī hairat meñ izāfa nahīñ kartā

har zaḳhm kī lazzat kā parastār huuñ lekin

sairāb mujhe ye bhī nivāla nahīñ kartā

manzil se hai ye kaisī aqīdat ki safar meñ

raahī koī raste pe bharosa nahīñ kartā

ab dahr meñ aġhyār kī rasmoñ kā chalan hai

ab kaam azīzoñ kā tarīqa nahīñ kartā

kaisā hai mirī zaat kā bikhrāo ki 'rāhat'

sahrā mirī vus.at kā ahāta nahīñ kartā

main dasht mein gar KHud ko muhayya nahin karta

gardish se riha mujh ko bagula nahin karta

pahchan ko ek dil hi madad-gar bahut hai

so pesh koi aur hawala nahin karta

dekha hi nahin aankh ne jis shahr ko pahle

wo bhi meri hairat mein izafa nahin karta

har zaKHm ki lazzat ka parastar hun lekin

sairab mujhe ye bhi niwala nahin karta

manzil se hai ye kaisi aqidat ki safar mein

rahi koi raste pe bharosa nahin karta

ab dahr mein aghyar ki rasmon ka chalan hai

ab kaam azizon ka tariqa nahin karta

kaisa hai meri zat ka bikhrao ki 'rahat'

sahra meri wusat ka ahata nahin karta