main dil-zada hun agar dil-figar wo bhi hain

maiñ dil-zada huuñ agar dil-figār vo bhī haiñ

ki dard-e-ishq ke ab da.avedār vo bhī haiñ

huā hai jin ke karam se dil o nazar kā ziyāñ

ba-faiz-e-vaqt mire ġham-gusār vo bhī haiñ

shahīd jazboñ kī fahrist kyā murattab ho

shumār meñ jo nahīñ be-shumār vo bhī haiñ

dil-e-tabāh! ye āsār haiñ qayāmat ke

rahīn-e-gardish-e-lail-o-nahār vo bhī haiñ

harīm-e-husn kī taz.īn the jo paikar-e-nāz

ba-hāl-e-zār sar-e-rahguzār vo bhī haiñ

vo jin se aam huī dāstān-e-ahd-e-junūñ

tire gunah dil-e-nā-kardā-kār vo bhī haiñ

main dil-zada hun agar dil-figar wo bhi hain

ki dard-e-ishq ke ab dawedar wo bhi hain

hua hai jin ke karam se dil o nazar ka ziyan

ba-faiz-e-waqt mere gham-gusar wo bhi hain

shahid jazbon ki fahrist kya murattab ho

shumar mein jo nahin be-shumar wo bhi hain

dil-e-tabah! ye aasar hain qayamat ke

rahin-e-gardish-e-lail-o-nahaar wo bhi hain

harim-e-husn ki tazin the jo paikar-e-naz

ba-haal-e-zar sar-e-rahguzar wo bhi hain

wo jin se aam hui dastan-e-ahd-e-junun

tere gunah dil-e-na-karda-kar wo bhi hain