main din ko raat ke dariya mein jab utar aaya

maiñ din ko raat ke dariyā meñ jab utaar aayā

mujhe zamīn kī gardish pe e'tibār aayā

maiñ kaun kaun se hisse meñ raushnī likkhūñ

ki ab to saarā ilāqa pas-e-ġhubār aayā

jo kar rahā thā barābar nasīhateñ mujh ko

vo ek daav meñ saarī hayāt haar aayā

dayār-e-ishq meñ ḳhairāt jab milī mujh ko

mire nasīb kī jholī meñ intizār aayā

shab-e-firāq ke lamhe the itne tūlānī

maiñ ek raat meñ sadiyāñ ka.ī guzār aayā

nikal sakā na dukhoñ ke hisār se bāhar

tamām ziist isī ḳhol meñ guzār aayā

havā ke paañv to shal ho ga.e the raste meñ

ye kaun pattoñ meñ sargoshiyāñ ubhār aayā

main din ko raat ke dariya mein jab utar aaya

mujhe zamin ki gardish pe e'tibar aaya

main kaun kaun se hisse mein raushni likkhun

ki ab to sara ilaqa pas-e-ghubar aaya

jo kar raha tha barabar nasihaten mujh ko

wo ek daw mein sari hayat haar aaya

dayar-e-ishq mein KHairaat jab mili mujh ko

mere nasib ki jholi mein intizar aaya

shab-e-firaq ke lamhe the itne tulani

main ek raat mein sadiyan kai guzar aaya

nikal saka na dukhon ke hisar se bahar

tamam zist isi KHol mein guzar aaya

hawa ke panw to shal ho gae the raste mein

ye kaun patton mein sargoshiyan ubhaar aaya