main dost se na kisi dushmani se Darta hun

maiñ dost se na kisī dushmanī se Dartā huuñ

bas is zabān kī be-pardagī se dabtā huuñ

maiñ duur duur se ḳhud ko uThā ke laatā rahā

ki TuuT jā.ūñ to phir duur tak bikhartā huuñ

ye sab ishāre mire kaam kyuuñ nahīñ aate

yaqīñ kī maañg ko rasm-e-gumāñ se bhartā huuñ

maiñ itnī duur nikal aayā shahr-e-hastī se

ḳhud apnī zaat se aksar lipaT ke rotā huuñ

abhī zamāna mire saath chalne vaalā hai

maiñ is ḳhayāl se jiitā huuñ aur na martā huuñ

zamāna DhūñD rahā hai mujhe makānoñ meñ

maiñ shahr-e-zāt ke andhe kueñ meñ rahtā huuñ

hamāre rāste jab se judā hue haiñ 'sa.īd'

maiñ apnī zaat ko mahsūs kar to saktā huuñ

main dost se na kisi dushmani se Darta hun

bas is zaban ki be-pardagi se dabta hun

main dur dur se KHud ko uTha ke lata raha

ki TuT jaun to phir dur tak bikharta hun

ye sab ishaare mere kaam kyun nahin aate

yaqin ki mang ko rasm-e-guman se bharta hun

main itni dur nikal aaya shahr-e-hasti se

KHud apni zat se aksar lipaT ke rota hun

abhi zamana mere sath chalne wala hai

main is KHayal se jita hun aur na marta hun

zamana DhunD raha hai mujhe makanon mein

main shahr-e-zat ke andhe kuen mein rahta hun

hamare raste jab se juda hue hain 'said'

main apni zat ko mahsus kar to sakta hun