main duniya ki haqiqat jaanta hun

maiñ duniyā kī haqīqat jāntā huuñ

kise miltī hai shohrat jāntā huuñ

mirī pahchān hai she'r-o-suḳhan se

maiñ apnī qadr-o-qīmat jāntā huuñ

terī yādeñ haiñ shab-bedāriyāñ haiñ

hai āñkhoñ ko shikāyat jāntā huuñ

maiñ rusvā ho gayā huuñ shahr-bhar meñ

magar kis kī badaulat jāntā huuñ

ġhazal phūloñ sī dil sahrāoñ jaisā

maiñ ahl-e-fan kī hālat jāntā huuñ

taḌap kar aur taḌpā.egī mujh ko

shab-e-ġham terī fitrat jāntā huuñ

sahar hone ko hai aisā lage hai

maiñ sūraj kī siyāsat jāntā huuñ

diyā hai 'naqsh' jo ġham zindagī ne

use maiñ apnī daulat jāntā huuñ

main duniya ki haqiqat jaanta hun

kise milti hai shohrat jaanta hun

meri pahchan hai she'r-o-suKHan se

main apni qadr-o-qimat jaanta hun

teri yaaden hain shab-bedariyan hain

hai aankhon ko shikayat jaanta hun

main ruswa ho gaya hun shahr-bhar mein

magar kis ki badaulat jaanta hun

ghazal phulon si dil sahraon jaisa

main ahl-e-fan ki haalat jaanta hun

taDap kar aur taDpaegi mujh ko

shab-e-gham teri fitrat jaanta hun

sahar hone ko hai aisa lage hai

main suraj ki siyasat jaanta hun

diya hai 'naqsh' jo gham zindagi ne

use main apni daulat jaanta hun