main ek andhe kuen ka qaidi kise milunga

maiñ ek andhe kueñ kā qaidī kise milūñgā

kahāñ mujhe DhūñDhne chalī hai najāt merī

ḳhajālat-e-darguzar se lab par duā na Thahrī

dar-e-samā.at se lauT aa.ī hai raat merī

maiñ kis ke qaul o qarār se apne ashk pochhūñ

mukar ga.ī hai ḳhud apne vādoñ se zaat merī

hai tishnagī kā nayā hī ik zā.iqa laboñ par

sarāb andar sarāb gardāñ hayāt merī

tanāb-e-ḳhema ke TūTne tak qayām merā

ki shāḳh-e-āhū pe aaj bhī hai barāt merī

main ek andhe kuen ka qaidi kise milunga

kahan mujhe DhunDhne chali hai najat meri

KHajalat-e-darguzar se lab par dua na Thahri

dar-e-samaat se lauT aai hai raat meri

main kis ke qaul o qarar se apne ashk pochhun

mukar gai hai KHud apne wadon se zat meri

hai tishnagi ka naya hi ek zaiqa labon par

sarab andar sarab gardan hayat meri

tanab-e-KHema ke TuTne tak qayam mera

ki shaKH-e-ahu pe aaj bhi hai baraat meri