main ek pal ki tha KHushbu kidhar nikal aaya

maiñ ek pal kī thā ḳhushbū kidhar nikal aayā

chalā maiñ mujh ko havā kā safar nikal aayā

na khīñchnī thī tumheñ sat.h-e-āb kī chādar

kabhī kā ghaat meñ baiThā bhañvar nikal aayā

barahnagī ko tamāshā bhī dardnāk milā

badan ke rañg jab utre khañDar nikal aayā

vo ek abr to bijlī se raat bhar laḌtā

havā ke miyān se ḳhanjar magar nikal aayā

sukūt-e-āb se Dar kar jo maarī chīḳh us ne

to ik kaTā huā dariyā se sar nikal aayā

shikast o reḳht ke hāthoñ ne kuchh diyā to sahī

girā makān to guḌiyā kā ghar nikal aayā

main ek pal ki tha KHushbu kidhar nikal aaya

chala main mujh ko hawa ka safar nikal aaya

na khinchni thi tumhein sath-e-ab ki chadar

kabhi ka ghat mein baiTha bhanwar nikal aaya

barahnagi ko tamasha bhi dardnak mila

badan ke rang jab utre khanDar nikal aaya

wo ek abr to bijli se raat bhar laDta

hawa ke miyan se KHanjar magar nikal aaya

sukut-e-ab se Dar kar jo mari chiKH us ne

to ek kaTa hua dariya se sar nikal aaya

shikast o reKHt ke hathon ne kuchh diya to sahi

gira makan to guDiya ka ghar nikal aaya