main haalat kya kahun dard-e-nihan ki

maiñ hālat kyā kahūñ dard-e-nihāñ kī

ayaañ ko kuchh nahīñ hājat bayāñ kī

mirī sūrat se zāhir hai mirā haal

zarūrat kyā mujhe sharh-o-bayāñ kī

zabāñ qāsir hai arz-e-hāl-e-dil se

zarūrat hai ise ik tarjumāñ kī

samajhne par agar ho koī maa.il

ḳhamoshī bhī hai ik sūrat bayāñ kī

jafā kī kyā shikāyat ho ki ai dil

jafā aadat hai mere mehrbāñ kī

jo samjhe shukr ko bhī ik shikāyat

shikāyat kyā ho aise bad-gumāñ kī

nahīñ jis ko ḳhabar apnī bhī us ko

ḳhabar kyā ho mire dard-e-nihāñ kī

hasīnān-e-jahāñ dekhe haiñ maiñ ne

haiñ sab nākām shakleñ us javāñ kī

kiyā thā maiñ ne kab ulfat kā da.avā

zarūrat kyā thī mere imtihāñ kī

milī qaid-e-qafas ke baa'd koī

ḳhabar mujh ko na mere āshiyāñ kī

jazāk-allah 'jalīl' achchhī ġhazal hai

bhalā kyā baat is husn-e-bayāñ kī

main haalat kya kahun dard-e-nihan ki

ayan ko kuchh nahin hajat bayan ki

meri surat se zahir hai mera haal

zarurat kya mujhe sharh-o-bayan ki

zaban qasir hai arz-e-haal-e-dil se

zarurat hai ise ek tarjuman ki

samajhne par agar ho koi mail

KHamoshi bhi hai ek surat bayan ki

jafa ki kya shikayat ho ki ai dil

jafa aadat hai mere mehrban ki

jo samjhe shukr ko bhi ek shikayat

shikayat kya ho aise bad-guman ki

nahin jis ko KHabar apni bhi us ko

KHabar kya ho mere dard-e-nihan ki

hasinan-e-jahan dekhe hain main ne

hain sab nakaam shaklen us jawan ki

kiya tha main ne kab ulfat ka dawa

zarurat kya thi mere imtihan ki

mili qaid-e-qafas ke ba'd koi

KHabar mujh ko na mere aashiyan ki

jazak-allah 'jalil' achchhi ghazal hai

bhala kya baat is husn-e-bayan ki