main hijab-e-guman tu hijab-e-yaqin

maiñ hijāb-e-gumāñ tū hijāb-e-yaqīñ

likh mirī ruuh par iztirāb-e-yaqīñ

jab muqaddar meñ be-nūr ta.abīr thī

kyoñ dikhā.e ujāloñ ne ḳhvāb-e-yaqīñ

apne hone kā ehsās bhī vahm sā

kā.enāt-e-tafakkur sarāb-e-yaqīñ

jism se ruuh tak āgahī kā safar

aur kuchh bhī nahīñ inqalāb-e-yaqīñ

harf-tā-harf sab nafs be-nūr haiñ

aaj dīmak-zada hai kitāb-e-yaqīñ

kitnī gahrī hai idrāk kī tīrgī

mere dil meñ utar āftāb-e-yaqīñ

chhīn lenā basārat mire ilm kī

jab bhī karne lagūñ ehtisāb-e-yaqīñ

merā malbūs ban e'timād-e-amal

le tire naam hai intisāb-e-yaqīñ

dā.era dā.era sab hī mahsūr haiñ

kaun kholegā 'parvāz' bāb-e-yaqīñ

main hijab-e-guman tu hijab-e-yaqin

likh meri ruh par iztirab-e-yaqin

jab muqaddar mein be-nur tabir thi

kyon dikhae ujalon ne KHwab-e-yaqin

apne hone ka ehsas bhi wahm sa

kaenat-e-tafakkur sarab-e-yaqin

jism se ruh tak aagahi ka safar

aur kuchh bhi nahin inqalab-e-yaqin

harf-ta-harf sab nafs be-nur hain

aaj dimak-zada hai kitab-e-yaqin

kitni gahri hai idrak ki tirgi

mere dil mein utar aaftab-e-yaqin

chhin lena basarat mere ilm ki

jab bhi karne lagun ehtisab-e-yaqin

mera malbus ban e'timad-e-amal

le tere nam hai intisab-e-yaqin

daera daera sab hi mahsur hain

kaun kholega 'parwaz' bab-e-yaqin