main hun apne kamre mein jaise ajnabi tanha

maiñ huuñ apne kamre meñ jaise ajnabī tanhā

aap bhī chale aate is taraf kabhī tanhā

har taraf havādis kī maujzan havā.eñ haiñ

kis se kis se Takrā.e ek aadmī tanhā

jā ke bas koī itnā ahraman se kah detā

vaqt kā mudāvā hai aaj raushnī tanhā

dekhne meñ duniyā hai ik hujūm-e-dil-dārāñ

sochiye to hotī hai har kī zindagī tanhā

har taraf sisakne kī aa rahī thiiñ āvāzeñ

ro rahī thī sahrā meñ raat chāñdnī tanhā

shahr shahr maskan hai zulmatoñ kā ab yaaro

gaañv gaañv raqsāñ hai aaj tīrgī tanhā

aap ne na pahchānā haañ vahī to pāshā thā

vo ḳhamosh gum-sum sā ek aadmī tanhā

main hun apne kamre mein jaise ajnabi tanha

aap bhi chale aate is taraf kabhi tanha

har taraf hawadis ki maujzan hawaen hain

kis se kis se Takrae ek aadmi tanha

ja ke bas koi itna ahraman se kah deta

waqt ka mudawa hai aaj raushni tanha

dekhne mein duniya hai ek hujum-e-dil-daran

sochiye to hoti hai har ki zindagi tanha

har taraf sisakne ki aa rahi thin aawazen

ro rahi thi sahra mein raat chandni tanha

shahr shahr maskan hai zulmaton ka ab yaro

ganw ganw raqsan hai aaj tirgi tanha

aap ne na pahchana han wahi to pasha tha

wo KHamosh gum-sum sa ek aadmi tanha