main hun ya tu hai KHud apne se gurezan jaise

maiñ huuñ yā tū hai ḳhud apne se gurezāñ jaise

mare aage koī saaya hai ḳhirāmāñ jaise

tujh se pahle to bahāroñ kā ye andāz na thā

phuul yuuñ khilte haiñ jaltā ho gulistāñ jaise

yuuñ tirī yaad se hotā hai ujālā dil meñ

chāñdnī meñ chamak uThtā hai bayābāñ jaise

dil meñ raushan haiñ abhī tak tire va.adoñ kā charāġh

TūTtī raat ke taare hoñ farozāñ jaise

tujhe paane kī tamannā tujhe khone kā yaqīñ

tere gesū mire māhaul meñ ġhaltāñ jaise

vaqt badlā pa na badlā mirā me.ār-e-vafā

āñdhiyoñ meñ sar-e-kohsār charāġhāñ jaise

ashk āñkhoñ meñ chamakte haiñ tabassum ban kar

aa gayā haath tirā gosha-e-dāmāñ jaise

tujh se mil kar bhī tamannā hai ki tujh se miltā

pyaar ke ba.ad bhī lab rahte haiñ larzāñ jaise

bharī duniyā meñ nazar aatā huuñ tanhā tanhā

marġh-zāroñ meñ koī qarya-e-vīrāñ jaise

ġham-e-jānāñ ġham-e-daurāñ kī taraf yuuñ aayā

jānib-e-shahr chale duḳhtar-e-dahqāñ jaise

asr-e-hāzir ko sunātā huuñ is andāz meñ sher

mausam-e-gul ho mazāroñ pe gul-afshāñ jaise

zaḳhm bhartā hai zamāna magar is tarah 'nadīm'

sī rahā ho koī phūloñ ke garebāñ jaise

main hun ya tu hai KHud apne se gurezan jaise

mare aage koi saya hai KHiraman jaise

tujh se pahle to bahaaron ka ye andaz na tha

phul yun khilte hain jalta ho gulistan jaise

yun teri yaad se hota hai ujala dil mein

chandni mein chamak uThta hai bayaban jaise

dil mein raushan hain abhi tak tere wadon ka charagh

TuTti raat ke tare hon farozan jaise

tujhe pane ki tamanna tujhe khone ka yaqin

tere gesu mere mahaul mein ghaltan jaise

waqt badla pa na badla mera mear-e-wafa

aandhiyon mein sar-e-kohsar charaghan jaise

ashk aankhon mein chamakte hain tabassum ban kar

aa gaya hath tera gosha-e-daman jaise

tujh se mil kar bhi tamanna hai ki tujh se milta

pyar ke baad bhi lab rahte hain larzan jaise

bhari duniya mein nazar aata hun tanha tanha

margh-zaron mein koi qarya-e-viran jaise

gham-e-jaanan gham-e-dauran ki taraf yun aaya

jaanib-e-shahr chale duKHtar-e-dahqan jaise

asr-e-hazir ko sunata hun is andaz mein sher

mausam-e-gul ho mazaron pe gul-afshan jaise

zaKHm bharta hai zamana magar is tarah 'nadim'

si raha ho koi phulon ke gareban jaise