main ek kashakash-e-ummid-o-bim tak pahuncha

maiñ ik kashākash-e-ummīd-o-bīm tak pahuñchā

kabhī tapish kabhī mauj-e-nasīm tak pahuñchā

har ek gaam pe tahqīq chāhtī thī ḳhirad

bhaTak gayā to rah-e-mustaqīm tak pahuñchā

mirī nigāh ne dil meñ tire utaar diyā

vo lafz jo na zabān-e-kalīm tak pahuñchā

tumhārī yaad ne maazī kā ruup dohrāyā

ye sāz-e-nau bhī navā-e-qadīm tak pahuñchā

liye charāġh-e-shanāsā.ī maiñ jidhar bhī gayā

muġhā.irat ke dayār-e-azīm tak pahuñchā

payām ban ke mirī zindagī kī jānib se

nafas nafas mire dil ke muqīm tak pahuñchā

ḳhushī vo lafz ki guzrā jo ma.anaviyyat se

to mere ġham kī kitāb-e-zaḳhīm tak pahuñchā

mire shu.ūr meñ shāmil rahā talab kā junūñ

maiñ shahr-e-gul meñ jo pahuñchā shamīm tak pahuñchā

jo barqarār salāmat-ravī rahī 'nāzish'

koī harīf na tab-e-salīm tak pahuñchā

main ek kashakash-e-ummid-o-bim tak pahuncha

kabhi tapish kabhi mauj-e-nasim tak pahuncha

har ek gam pe tahqiq chahti thi KHirad

bhaTak gaya to rah-e-mustaqim tak pahuncha

meri nigah ne dil mein tere utar diya

wo lafz jo na zaban-e-kalim tak pahuncha

tumhaari yaad ne mazi ka rup dohraya

ye saz-e-nau bhi nawa-e-qadim tak pahuncha

liye charagh-e-shanasai main jidhar bhi gaya

mughairat ke dayar-e-azim tak pahuncha

payam ban ke meri zindagi ki jaanib se

nafas nafas mere dil ke muqim tak pahuncha

KHushi wo lafz ki guzra jo manawiyyat se

to mere gham ki kitab-e-zaKHim tak pahuncha

mere shuur mein shamil raha talab ka junun

main shahr-e-gul mein jo pahuncha shamim tak pahuncha

jo barqarar salamat-rawi rahi 'nazish'

koi harif na tab-e-salim tak pahuncha