main is liye bhi kisi se wafa nahin karta

maiñ is liye bhī kisī se vafā nahīñ kartā

nahīñ hai aisā koī jo daġhā nahīñ kartā

tumhāre hisse meñ aaya huā diyā huuñ maiñ

diyā jo āñdhī se bilkul Darā nahīñ kartā

jahān-bhar kī dar-e-dil pe bhiiḌ ho lekin

sivā tire ye kisī par khulā nahīñ kartā

ye dekhnā hai ki iz.hār-e-ishq par mere

vo gul-badan mujhe haañ kartā yā nahīñ kartā

ab ik samar bhī nahīñ shajar-e-ḳhvāhishāt pe dost

maiñ tere baad kisī kī duā nahīñ kartā

maiñ tujh ko chāhtā huuñ lekin ek mushkil hai

kabhī kabhī mirā chāhā huā nahīñ kartā

mirī ḳhushī ke liye kuchh nahīñ kyā tū ne

tirī ḳhushī ke liye to maiñ kyā nahīñ kartā

main is liye bhi kisi se wafa nahin karta

nahin hai aisa koi jo dagha nahin karta

tumhaare hisse mein aaya hua diya hun main

diya jo aandhi se bilkul Dara nahin karta

jahan-bhar ki dar-e-dil pe bhiD ho lekin

siwa tere ye kisi par khula nahin karta

ye dekhna hai ki izhaar-e-ishq par mere

wo gul-badan mujhe han karta ya nahin karta

ab ek samar bhi nahin shajar-e-KHwahishat pe dost

main tere baad kisi ki dua nahin karta

main tujh ko chahta hun lekin ek mushkil hai

kabhi kabhi mera chaha hua nahin karta

meri KHushi ke liye kuchh nahin kya tu ne

teri KHushi ke liye to main kya nahin karta