main jaanta hun ki sare bure nahin hote

maiñ jāntā huuñ ki saare bure nahīñ hote

magar ye sach hai ki sab ek se nahīñ hote

mire paroñ meñ agar hausle nahīñ hote

ye āsmāñ mere aage jhuke nahīñ hote

mire sanam jo mujhe tum mile nahīñ hote

sukūn-e-dil se mire rābte nahīñ hote

zamīn paanī havā dekh bhalā sab kuchh hai

na jaane kyoñ mere buuTe hare nahīñ hote

ye terā qad hai jo rakhtā hai ahmiyat varna

ḳhush-āmdīd ko saare jhuke nahīñ hote

adālatoñ se juḌe saare dāvedāroñ meñ

ye chuġhliyāñ haiñ sahī faisle nahīñ hote

jo ho sake to zabāñ ko zarā saral rakhnā

bahut se netā ziyāda paḌhe nahīñ hote

mire ḳhudā kī ināyat agar nahīñ hotī

mire charāġh havā meñ jale nahīñ hote

tamām umr ka.ī log chhoTe rahte haiñ

bulandiyoñ pe bhī jā kar baḌe nahīñ hote

main jaanta hun ki sare bure nahin hote

magar ye sach hai ki sab ek se nahin hote

mere paron mein agar hausle nahin hote

ye aasman mere aage jhuke nahin hote

mere sanam jo mujhe tum mile nahin hote

sukun-e-dil se mere rabte nahin hote

zamin pani hawa dekh bhala sab kuchh hai

na jaane kyon mere buTe hare nahin hote

ye tera qad hai jo rakhta hai ahmiyat warna

KHush-amdid ko sare jhuke nahin hote

adalaton se juDe sare dawedaron mein

ye chughliyan hain sahi faisle nahin hote

jo ho sake to zaban ko zara saral rakhna

bahut se neta ziyaada paDhe nahin hote

mere KHuda ki inayat agar nahin hoti

mere charagh hawa mein jale nahin hote

tamam umr kai log chhoTe rahte hain

bulandiyon pe bhi ja kar baDe nahin hote