main jabha sa hun us dar-e-ali-maqam ka

maiñ jab.ha sā huuñ us dar-e-ālī-maqām kā

kaaba jahāñ javāb na paa.e salām kā

sikka ravāñ hai kis but-e-mahshar-ḳhirām kā

naqsh-e-qadam nagīñ hai qayāmat ke naam kā

kyā pās-e-ġhair-e-qasd hai gar qatl-e-ām kā

ik murda duur rakh do masīhā ke naam kā

ai rah-ravān-e-manzil-e-maqsūd marhabā

chamkā kalas vo rauza-e-dārus-salām kā

ḳhanjar sambhāliye pa-e-taslīm ḳham haiñ ham

gardan javāb le ke uThegī salām kā

ġhash kaisā maiñ to tarz-e-takallum pe mar gayā

muusā ne kuchh bhī lutf na paayā kalām kā

mujh se huā hai vāda-e-roz-e-jazā abhī

dete ho kyā javāb adū ke payām kā

ai 'shola' kah do bulbul-e-ḳhuld-e-barīñ se ab

gul-dasta bāñdh le mere rañgīñ kalām kā

main jabha sa hun us dar-e-ali-maqam ka

kaba jahan jawab na pae salam ka

sikka rawan hai kis but-e-mahshar-KHiram ka

naqsh-e-qadam nagin hai qayamat ke nam ka

kya pas-e-ghair-e-qasd hai gar qatl-e-am ka

ek murda dur rakh do masiha ke nam ka

ai rah-rawan-e-manzil-e-maqsud marhaba

chamka kalas wo rauza-e-darus-salam ka

KHanjar sambhaaliye pa-e-taslim KHam hain hum

gardan jawab le ke uThegi salam ka

ghash kaisa main to tarz-e-takallum pe mar gaya

musa ne kuchh bhi lutf na paya kalam ka

mujh se hua hai wada-e-roz-e-jaza abhi

dete ho kya jawab adu ke payam ka

ai 'shola' kah do bulbul-e-KHuld-e-barin se ab

gul-dasta bandh le mere rangin kalam ka