main jis jagah bhi rahunga wahin pe aaega

maiñ jis jagah bhī rahūñgā vahīñ pe aa.egā

mirā sitāra kisī din zamīñ pe aa.egā

lakīr khīñch ke baiThī hai tishnagī mirī

bas ek zid hai ki dariyā yahīñ pe aa.egā

muhīb saa.e baḌhe aate haiñ hamārī taraf

kab e'tibār hameñ dūr-bīñ pe aa.egā

ab is adā se havā.eñ diye bujhā.eñgī

ki ittihām bhī ḳhāna-nashīñ pe aa.egā

kamān-e-vaqt ne ham ko hadaf banāyā hai

kahīñ se tiir chalegā hamīñ pe aa.egā

uḌā rahā huuñ ġhubāra magar ḳhabar hai mujhe

zarā sī der meñ vāpas zamīñ pe aa.egā

main jis jagah bhi rahunga wahin pe aaega

mera sitara kisi din zamin pe aaega

lakir khinch ke baiThi hai tishnagi meri

bas ek zid hai ki dariya yahin pe aaega

muhib sae baDhe aate hain hamari taraf

kab e'tibar hamein dur-bin pe aaega

ab is ada se hawaen diye bujhaengi

ki ittiham bhi KHana-nashin pe aaega

kaman-e-waqt ne hum ko hadaf banaya hai

kahin se tir chalega hamin pe aaega

uDa raha hun ghubara magar KHabar hai mujhe

zara si der mein wapas zamin pe aaega