main kahun kya unhen yaqin hi nahin

maiñ kahūñ kyā unheñ yaqīñ hī nahīñ

vo kahe jaate haiñ nahīñ hī nahīñ

yā koī āshiq is jahāñ meñ nahīñ

yā koī aap sā hasīñ hī nahīñ

aap be-mehr bhī haiñ zālim bhī

mujh se suniye faqat hasīñ hī nahīñ

dekhegā jā.egā jo jannat meñ

aish zāhid hameñ yahīñ hī nahīñ

jis pe kanda ho naqsh ulfat kā

dil se behtar koī nagīñ hī nahīñ

aur kuchh kahiye is samajh pe unheñ

shaiḳh sāhab ko āfrīñ hī nahīñ

dasht-e-vahshat maze dikhā detā

kyā kaheñ jeb-o-āstīñ hī nahīñ

yā tirā sang-e-dar nahīñ zālim

yā mirī aaj ye jabīñ hī nahīñ

ḳhud use ai 'fahīm' kah dekho

gar mirī baat kā yaqīñ hī nahīñ

main kahun kya unhen yaqin hi nahin

wo kahe jate hain nahin hi nahin

ya koi aashiq is jahan mein nahin

ya koi aap sa hasin hi nahin

aap be-mehr bhi hain zalim bhi

mujh se suniye faqat hasin hi nahin

dekhega jaega jo jannat mein

aish zahid hamein yahin hi nahin

jis pe kanda ho naqsh ulfat ka

dil se behtar koi nagin hi nahin

aur kuchh kahiye is samajh pe unhen

shaiKH sahab ko aafrin hi nahin

dasht-e-wahshat maze dikha deta

kya kahen jeb-o-astin hi nahin

ya tera sang-e-dar nahin zalim

ya meri aaj ye jabin hi nahin

KHud use ai 'fahim' kah dekho

gar meri baat ka yaqin hi nahin