maiñ ḳhāl-o-ḳhad kā sarāpā tasavvurāt meñ thā
damaktī zaat kā sūraj añdherī raat meñ thā
vo vaqt ab bhī nigāhoñ meñ jagmagātā hai
ye kā.enāt thī mujh meñ maiñ kā.enāt meñ thā
maiñ shahr shahr kī hairāniyoñ se guzrā huuñ
mirā vajūd bhī shāyad ajā.ibāt meñ thā
anā ke dasht meñ sadiyoñ kī dhuul oḌhe hue
na jaane kab se vo uljhā ta.assubāt meñ thā
tamām shor-sharāba nafas nafas meñ liye
vo Dūbtā huā ehsās shab-barāt meñ thā
ye sub.h-o-shām mulāqāt hai ajīran sī
kabhī-kabhār kā milnā tabarrukāt meñ thā
'hayāt' DhūñD rahā huuñ vo lucknow ki jahāñ
sharāfatoñ kā asāsa takallufāt meñ thā
main KHal-o-KHad ka sarapa tasawwuraat mein tha
damakti zat ka suraj andheri raat mein tha
wo waqt ab bhi nigahon mein jagmagata hai
ye kaenat thi mujh mein main kaenat mein tha
main shahr shahr ki hairaniyon se guzra hun
mera wajud bhi shayad ajaibaat mein tha
ana ke dasht mein sadiyon ki dhul oDhe hue
na jaane kab se wo uljha tassubaat mein tha
tamam shor-sharaba nafas nafas mein liye
wo Dubta hua ehsas shab-baraat mein tha
ye subh-o-sham mulaqat hai ajiran si
kabhi-kabhaar ka milna tabarrukat mein tha
'hayat' DhunD raha hun wo lucknow ki jahan
sharafaton ka asasa takallufat mein tha
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.