main KHud ko aazmana chahta hun

maiñ ḳhud ko āzmānā chāhtā huuñ

havā par āshiyāna chāhtā huuñ

jo himmat hai to mere saath aao

ufuq ke paar jaanā chāhtā huuñ

jo minnat-kash nahīñ haiñ bāl-o-par ke

parinde vo uḌānā chāhtā huuñ

nigūñ kar de jo tūfānoñ kā sar bhī

charāġh aisā jalānā chāhtā huuñ

sukūñ baḳhshe jo har āshufta-sar ko

ġhazal aisī sunānā chāhtā huuñ

nazar aa jaa.e jis meñ aks-e-jāñ bhī

vo ā.īna banānā chāhtā huuñ

sarāsīma pashemāñ dil-girafta

maiñ ye mausam haTānā chāhtā huuñ

ḳhayāl-o-ḳhvāb jin meñ hukmrāñ hoñ

vahī duniyā basānā chāhtā huuñ

ziyāda mil ga.ī rone se rāhat

'zafar' ab muskurānā chāhtā huuñ

main KHud ko aazmana chahta hun

hawa par aashiyana chahta hun

jo himmat hai to mere sath aao

ufuq ke par jaana chahta hun

jo minnat-kash nahin hain baal-o-par ke

parinde wo uDana chahta hun

nigun kar de jo tufanon ka sar bhi

charagh aisa jalana chahta hun

sukun baKHshe jo har aashufta-sar ko

ghazal aisi sunana chahta hun

nazar aa jae jis mein aks-e-jaan bhi

wo aaina banana chahta hun

sarasima pasheman dil-girafta

main ye mausam haTana chahta hun

KHayal-o-KHwab jin mein hukmran hon

wahi duniya basana chahta hun

ziyaada mil gai rone se rahat

'zafar' ab muskurana chahta hun