main KHud saqi hun apna mere pahlu mein hai paimana

maiñ ḳhud saaqī huuñ apnā mere pahlū meñ hai paimāna

vo paimāna ki ḳhud miinā bhī hai aur ḳhud hī mai-ḳhāna

agar sham-e-haqīqat kī ziyā-bārī nahīñ har-sū

taḳhayyul ko kahāñ se aa ga.e ādāb-e-parvāna

par-e-parvāz baḳhshe mujh ko mere ishq-o-mastī ne

haqīqat se jabhī dilchasp-tar hai merā afsāna

maqām-e-haif-o-hairat hai ki us ko hī masal Daalā

numū sidra kī apne siine meñ rakhtā thā jo daana

vahī is bazm-e-hastī se surūr-andoz hote haiñ

nigāheñ jin kī hoñ bebāk aur atvār mardāna

mujhe ahl-e-nazar kī aañkh hī pahchān saktī hai

ki sūrat to hai rindāna magar sīrat hakīmāna

'amīñ' hai daad ke qābil vasī'-ul-mashrabī merī

ki farzānoñ meñ farzāna huuñ dīvānoñ meñ dīvāna

main KHud saqi hun apna mere pahlu mein hai paimana

wo paimana ki KHud mina bhi hai aur KHud hi mai-KHana

agar sham-e-haqiqat ki ziya-bari nahin har-su

taKHayyul ko kahan se aa gae aadab-e-parwana

par-e-parwaz baKHshe mujh ko mere ishq-o-masti ne

haqiqat se jabhi dilchasp-tar hai mera afsana

maqam-e-haif-o-hairat hai ki us ko hi masal Dala

numu sidra ki apne sine mein rakhta tha jo dana

wahi is bazm-e-hasti se surur-andoz hote hain

nigahen jin ki hon bebak aur atwar mardana

mujhe ahl-e-nazar ki aankh hi pahchan sakti hai

ki surat to hai rindana magar sirat hakimana

'amin' hai dad ke qabil wasi'-ul-mashrabi meri

ki farzanon mein farzana hun diwanon mein diwana