main kisi ki raat ka tanha charagh

maiñ kisī kī raat kā tanhā charāġh

itnā sunñā thā ki phir mahkā charāġh

tāq-e-jāñ kī gul huī afsurdagī

aas ne ummīd kā rakkhā charāġh

andarūn-e-zāt tak khultā huā

jism ke jañgal meñ ik ugtā charāġh

do sitāre jaḌ ke yakjā ho ga.e

āḳhir-e-shab Duub kar ubhrā charāġh

ḳhvāb meñ donoñ ne dekhī raushnī

niiñd meñ mil baañT kar DhūñDā charāġh

tīrgī ke dā.ere meñ rakh gayā

ek saaya aa ke phir jaltā charāġh

sāhiloñ kī nazar kar aa.ī havā

minnatoñ kā ek man-chāhā charāġh

lo koī tajsīm kar paayā kahāñ

mom ban kar rāt-bhar pighlā charāġh

nīm-vā āñkhoñ se mujh ko dekh kar

gul huā jaatā hai ik būḌhā charāġh

main kisi ki raat ka tanha charagh

itna sunna tha ki phir mahka charagh

taq-e-jaan ki gul hui afsurdagi

aas ne ummid ka rakkha charagh

andarun-e-zat tak khulta hua

jism ke jangal mein ek ugta charagh

do sitare jaD ke yakja ho gae

aaKHir-e-shab Dub kar ubhra charagh

KHwab mein donon ne dekhi raushni

nind mein mil banT kar DhunDa charagh

tirgi ke daere mein rakh gaya

ek saya aa ke phir jalta charagh

sahilon ki nazar kar aai hawa

minnaton ka ek man-chaha charagh

lo koi tajsim kar paya kahan

mom ban kar raat-bhar pighla charagh

nim-wa aankhon se mujh ko dekh kar

gul hua jata hai ek buDha charagh