main mutmain na hua tujhko gham suna ke bhi

maiñ mutma.in na huā tujh ko ġham sunā ke bhī

añdherā aur baḌhā hai diyā jalā ke bhī

qubūl karte hue dil taḌapne lagtā hai

ajiib hote haiñ kuchh faisle ḳhudā ke bhī

vo āsmān mirī dastaras meñ kyā aatā

hazār koshisheñ kiiñ eḌiyāñ uThā ke bhī

tujhe gale se lagā.eñ to jaañ nikaltī hai

asīr-e-jism haiñ lekin tirī hayā ke bhī

magar ye kyā ki parinde shajar se gir jaa.eñ

agarche hote haiñ kuchh fā.ede havā ke bhī

qafas kā qīmtī panchhī huuñ so ḳharīdte vaqt

mujhe uḌā ke bhī dekhā gayā girā ke bhī

nahīñ hai dasht faqat pyaas kā havāla 'adīl'

maiñ ro paḌā huuñ samundar ko aazmā ke bhī

main mutmain na hua tujh ko gham suna ke bhi

andhera aur baDha hai diya jala ke bhi

qubul karte hue dil taDapne lagta hai

ajib hote hain kuchh faisle KHuda ke bhi

wo aasman meri dastaras mein kya aata

hazar koshishen kin eDiyan uTha ke bhi

tujhe gale se lagaen to jaan nikalti hai

asir-e-jism hain lekin teri haya ke bhi

magar ye kya ki parinde shajar se gir jaen

agarche hote hain kuchh faede hawa ke bhi

qafas ka qimti panchhi hun so KHaridte waqt

mujhe uDa ke bhi dekha gaya gira ke bhi

nahin hai dasht faqat pyas ka hawala 'adil'

main ro paDa hun samundar ko aazma ke bhi