main nahin kahti mujhe koi KHazana chahiye

maiñ nahīñ kahtī mujhe koī ḳhazāna chāhiye

iltijā itnī hai ulfat jāvedāna chāhiye

aish-o-ishrat ke binā bhī kaam chal saktā hai jī

chhat to sab ko chāhiye aur āb-o-dānā chāhiye

ishq merā jis meñ mahke ai mire rabb-e-karīm

mujh ko jannat se alag vo āshiyānā chāhiye

is shikāyat ko mirī tū duur kar saktā hai kyā

vaqt terā chāhiye aur vālihāna chāhiye

rab ko paane kī jo hasrat hai to is ke vāste

dil nazar aur be-niyāzī ārifāna chāhiye

ham-safar māñgā thā maiñ ne ġham diye tū ne mujhe

ab talab ye hai ke ġham kā ik zamāna chāhiye

dil nazar kyā ruuh tak rang-e-tasavvuf chhā gayā

ab ġhazal bhī mujh ko maulā sūfiyāna chāhiye

hijr terā de hī degā maut ik din 'sapnā' ko

zindagī jiine kā lekin ik bahāna chāhiye

main nahin kahti mujhe koi KHazana chahiye

iltija itni hai ulfat jawedana chahiye

aish-o-ishrat ke bina bhi kaam chal sakta hai ji

chhat to sab ko chahiye aur aab-o-dana chahiye

ishq mera jis mein mahke ai mere rabb-e-karim

mujh ko jannat se alag wo aashiyana chahiye

is shikayat ko meri tu dur kar sakta hai kya

waqt tera chahiye aur walihana chahiye

rab ko pane ki jo hasrat hai to is ke waste

dil nazar aur be-niyazi aarifana chahiye

ham-safar manga tha main ne gham diye tu ne mujhe

ab talab ye hai ke gham ka ek zamana chahiye

dil nazar kya ruh tak rang-e-tasawwuf chha gaya

ab ghazal bhi mujh ko maula sufiyana chahiye

hijr tera de hi dega maut ek din 'sapna' ko

zindagi jine ka lekin ek bahana chahiye