main naqsh-ha-e-KHun-e-wafa chhoD jaunga

maiñ naqsh-hā-e-ḳhūn-e-vafā chhoḌ jā.ūñgā

ya.anī ki rāz-e-rañg-e-hinā chhoḌ jā.ūñgā

tū aane vaale kal ke liye kyuuñ hai fikrmand

tere liye maiñ apnī duā chhoḌ jā.ūñgā

tere ḳhilāf koī na khole kabhī zabāñ

terī nigāh meñ vo nasha chhoḌ jā.ūñgā

aa jā.iyegā shauq se be bechain jab ho dil

darvāza apne ghar kā khulā chhoḌ jā.ūñgā

ruḳhsār-o-lab kī terī na kam hoñgī raunaqeñ

maiñ har ġhazal meñ zikr tirā chhoḌ jā.ūñgā

ā.īne de sakeñge na tujh ko kabhī fareb

terī jabīñ pe terā pata chhoḌ jā.ūñgā

ik ḳhaas chiiz chhoḌūñgā sab ke liye 'alīm'

pahle se kyuuñ batā.ūñ ki kyā chhoḌ jā.ūñgā

main naqsh-ha-e-KHun-e-wafa chhoD jaunga

yani ki raaz-e-rang-e-hina chhoD jaunga

tu aane wale kal ke liye kyun hai fikrmand

tere liye main apni dua chhoD jaunga

tere KHilaf koi na khole kabhi zaban

teri nigah mein wo nasha chhoD jaunga

aa jaiyega shauq se be bechain jab ho dil

darwaza apne ghar ka khula chhoD jaunga

ruKHsar-o-lab ki teri na kam hongi raunaqen

main har ghazal mein zikr tera chhoD jaunga

aaine de sakenge na tujh ko kabhi fareb

teri jabin pe tera pata chhoD jaunga

ek KHas chiz chhoDunga sab ke liye 'alim'

pahle se kyun bataun ki kya chhoD jaunga