maine aaghaz mein anjam ki baaten ki hain

maiñ ne āġhāz meñ anjām kī bāteñ kī haiñ

gar samajh lo to baḌe kaam kī bāteñ kī haiñ

vahī jazba jo mohabbat kā amiiñ hotā hai

haañ usī jazba-e-be-nām kī bāteñ kī haiñ

ham sunā baiThe haiñ afsāna-e-kaunain unheñ

aur kahne ko faqat naam kī bāteñ kī haiñ

chand mauhūm umīdoñ kā sahārā le kar

aaj un se dil-e-nākām kī bāteñ kī haiñ

kaañp uThī hai mirī duniyā-e-mohabbat ai dost

dil se jab ishq ke anjām kī bāteñ kī haiñ

maiñ guzar aaya har ik kaifiyat-e-mai se 'zakī'

vo samajhte haiñ ki bas jaam kī bāteñ kī haiñ

main ne aaghaz mein anjam ki baaten ki hain

gar samajh lo to baDe kaam ki baaten ki hain

wahi jazba jo mohabbat ka amin hota hai

han usi jazba-e-be-nam ki baaten ki hain

hum suna baiThe hain afsana-e-kaunain unhen

aur kahne ko faqat nam ki baaten ki hain

chand mauhum umidon ka sahaara le kar

aaj un se dil-e-nakaam ki baaten ki hain

kanp uThi hai meri duniya-e-mohabbat ai dost

dil se jab ishq ke anjam ki baaten ki hain

main guzar aaya har ek kaifiyat-e-mai se 'zaki'

wo samajhte hain ki bas jam ki baaten ki hain