maine biThla ke jo pas usko khilaya biDa

maiñ ne biThlā ke jo paas us ko khilāyā biiḌā

qatl par mere raqīboñ ne uThāyā biiḌā

mushta.il tā-ba-falak ātish-e-pur-dūd huī

mal ke jis vaqt misī tum ne chabāyā biiḌā

surḳh-rū ho ke ye kis muñh se tū ab bole hai

maiñ ne kis roz tire haath se paayā biiḌā

merī aur aap kī majlis meñ bigaḌ jā.egī

tum ne dene ko kisī ke jo banāyā biiḌā

sabz-baḳhtī kahūñ kyā apnī ki vo jaan gayā

paḌh ke afsūñ meñ khilāne ko jo laayā biiḌā

laal kar dūñgā abhī bazm meñ muñh kitnoñ ke

haath se tū ne kisī ko jo khilāyā biiḌā

ai 'nasīr' us ke gale kā huuñ na maiñ kyūñkar haar

aaj gul-rū ne mujhe dekh chabāyā biiḌā

main ne biThla ke jo pas us ko khilaya biDa

qatl par mere raqibon ne uThaya biDa

mushtail ta-ba-falak aatish-e-pur-dud hui

mal ke jis waqt misi tum ne chabaya biDa

surKH-ru ho ke ye kis munh se tu ab bole hai

main ne kis roz tere hath se paya biDa

meri aur aap ki majlis mein bigaD jaegi

tum ne dene ko kisi ke jo banaya biDa

sabz-baKHti kahun kya apni ki wo jaan gaya

paDh ke afsun mein khilane ko jo laya biDa

lal kar dunga abhi bazm mein munh kitnon ke

hath se tu ne kisi ko jo khilaya biDa

ai 'nasir' us ke gale ka hun na main kyunkar haar

aaj gul-ru ne mujhe dekh chabaya biDa