maine dekha nahin hindu ya musalman ho tum

maiñ ne dekhā nahīñ hindū yā musalmān ho tum

haañ faqat itnā hai dekhā ki ik insān ho tum

bas tirī hī to mohabbat meñ likhī hai maiñ ne

merī is pahlī ġhazal kā bhī to unvān ho tum

tere dil meñ maiñ nahīñ par mire dil meñ tum ho

tum pe sau jaan se qurbān mirī jaan ho tum

terī āñkhoñ ke samundar meñ maiñ Dūbūñgā nahīñ

mujh ko mālūm hai ye merī nigahbān ho tum

gar mohabbat se kahogī to chalā jā.ūñgā

itnī sī baat hai kyoñ itnā pareshān ho tum

ek hī zaat ne ham sab ko banāyā hai 'turāb'

aisā lagtā hai ki is baat se anjān ho tum

main ne dekha nahin hindu ya musalman ho tum

han faqat itna hai dekha ki ek insan ho tum

bas teri hi to mohabbat mein likhi hai main ne

meri is pahli ghazal ka bhi to unwan ho tum

tere dil mein main nahin par mere dil mein tum ho

tum pe sau jaan se qurban meri jaan ho tum

teri aankhon ke samundar mein main Dubunga nahin

mujh ko malum hai ye meri nigahban ho tum

gar mohabbat se kahogi to chala jaunga

itni si baat hai kyon itna pareshan ho tum

ek hi zat ne hum sab ko banaya hai 'turab'

aisa lagta hai ki is baat se anjaan ho tum